• आइतवार, पुस १३, २०७६
• खोटाङ टुडे

पुस १३ आइतवार, २०७६
खोटाङ । विद्युत विस्तार भएपछि खोटाङको हलेसी तुवाचुङ नगरपालिका–६ मंगलटारका दलितवस्तीमा कुटानपिसान मिल सञ्चालनमा ल्याइएको छ । विद्युत विस्तारका कारण विद्युतीय उपकरण सञ्चालन गर्ने वातावरण बनेसँगै मंगलटारका दलित बस्तीमा कुटानपिसान मिल सञ्चालनमा ल्याइएको हो ।

वडा कार्यालयको बजेटबाट मंगलटारको दलित समुदायको बाहुल्यता रहेको बरबोट र गैरीगाउँमा कुटानपिसान मिल जडान गरिएको वडाध्यक्ष रमेश राउतले बताए ।

यस्तै, नगरपालिकाको महिला कृषक समुहको बजेटबाट दुधकोसी किनारमा रहेको छतिवनमा एक वटा कुटानपिसान मिल सञ्चालनमा ल्याइएको छ । ढुवानी सहित ४७ हजारको खर्चमा दलितवस्तीमा कुटानपिसान मिल जडान गरिएको वडाध्यक्ष राउतले बताए ।

गाईघाट–दिक्तेल ३३ केभी प्रशारणलाईन अन्तरगतको विद्युत विस्तार गरेपछि २०७५ साल जेठमा मंगलटारलाई उज्यालो वडा घोषणा गरिएको थियो । विद्युत विस्तार भएका कारण अन्य ठाउँमा पनि मिल जडान गरिने वडा कार्यालयले जनाएको छ ।