सुनकोशीकोे पानी तान्न लिफ्टिङ कार्य सुरु

माघ १३ सोमवार, २०७६
खोटाङ । खोटाङको दिप्रुङ चुईचुम्मा गाउँपालिकाले कोशीको पानी तान्नका लागि लिफ्टिङ गर्ने काम सुरु गरेकोे छ । गाउँपालिकाको बतासेस्थित भण्डारेघाटका स्थानीयहरुले दैनिक उपभोग गर्न र सिंचाई गर्नका लागि नजिकैको सुनकोशीको पानी लिफ्टिङ कार्य सुरु गरेको हो ।

गाउँपालिकाको आर्थिक वर्ष २०७६/०७७ बाट विनियोजन गरेको ३० लाख बजेटबाट सोमबारदेखि कोशीको पानी तान्न विभिन्न पूर्वाधारहरुको काम सुरु भएको आइटी अफिसर मणिचन्द्र राईले जानकारी दिए । खानेपानी तथा सिंचाई गर्नलाई प्रशस्त पानीको अभावमा वसेका र दैनिक जीवन गुजाराका निम्ति कतिपय अवस्थामा कोशीको पानी समेत उपभोग गरिरहेका ६० घरधुरी बढीलाई पुग्नेगरी लिफ्टिङको काम सुरु गरिएको छ ।

उपभोक्ता समिति निर्माण गरेर सुरु भएको लिफ्टिङको काम यहि आर्थिक वर्षमा समापन हुनेछ । सुनकोशीको पानी लिफ्टिङ गरेर भण्डारेघाटको सिरानमा ४० हजार लिटर क्षमताको ट्याङकीमा जम्मा गरेर घरघरमा वितरण गरिने गाउँपालिकाले जनाएको छ ।

सुनकोशीबाट रिर्जभ ट्याङकीसम्म ८ ईन्चको पाईपबाट पानी आउनेछ । महुरे फोक्सिङटार सडकले छोएको भण्डारेघाटको पानीको समस्या र आगामी दिनमा त्यहाँ बजारीकरण हुने कुरालाई ध्यानमा राखेर खानेपानीको व्यवस्थापन गर्न लागिएको दिप्रुङ चुईचुम्मा गाउँपालिका अध्यक्ष अध्यक्ष भुपेन्द्र राईले बताए ।

अहिले सो भेगका स्थानीयले बतासेकै हमारा भन्ने स्थानको पानी ल्याएर उपभोग गरिरहेको छ । पानीको अभावमा कोसीकै पानी पनि उपभोग गरिरहेका छन् ।