• आइतवार, अशोज ७, २०७५
• खोटाङ टुडे

खोटाङ । खोटाङमा आठौं राष्ट्रिय खेलकुदको छनौट प्रतियोगीताको मिति तय गरिएको छ । आठौं राष्ट्रिय खेलकुद प्रतियोगीतामा सहभागी हुने खेलाडी छनौटका लागि आगामी कार्तिक ११ गतेदेखि १३ गतेसम्म जिल्ला छनौट प्रतियोगीता सञ्चालनको मिति तयारी गरिएको जिल्ला खेलकुद विकास समिति खोटाङले जनाएको छ ।

आगामी मंसिर २१ गतेदेखि २८ गतेसम्म सञ्चालन हुने राष्ट्रिय खेलकुद प्रतियोगीताका लागि जिल्लाबाट एथ्लेटिक्स, भलिवल, तेक्वान्दो, कराते, फुटबल, ब्याटमिन्टन, बुद्धिचाल, बक्सिङ, टेबलटेनिस, उसु लगायतका खेलमा ६० पुरुष र ५३ महिला खेलाडी छनौट गरिने जिल्ला खेलकुद विकास समितिका अध्यक्ष माईतीराज राईले बताए ।

जिल्ला छनौटमा परेका ११३ खेलाडीले प्रदेश स्तरिय प्रतियोगीतामा प्रतिष्पर्धा गर्दै राष्ट्रिय प्रतियोगीतामा सहभागी हुन पाउने होटल इन्द्रेणीमा आईतबार आयोजित पत्रकार भेटघाट कार्यक्रममा जानकारी दिइएको छ । सितोरियो कराते, फुटबल, व्याटमिन्टन, बुद्धिचाल, बक्सिङ र उसुको छनौट खेल दिक्तेलमा, एथ्लेटिक्स, भलिबल र तेक्वान्दोको छनौट खेल बाक्सिलामा तथा टेबल टेनिसको छनौट प्रतियोगीता नुनथलामा सञ्चालन गरिने खेलकुद विकास समितिका अध्यक्ष राईले जानकारी दिए । कबड्डी प्रतियोगीताको कोटा समेत माग गरिएको खेलकुद विकास समितिले जनाएको छ ।

छनौट खेलमार्फत फुटवलतर्फ महिला पुरुष १६/१६ जना, सितोरियो करातेमा पुरुष ११ र महिना १० जना, भलिबलमा महिला पुरुष १०/१० जना, तेक्वान्दोका महिला पुरुष ८/८ जना, एथ्लेटिक्समा महिला पुरुष ४/४ जना, बक्सिङमा पुरुष ४ जना, व्याटमिन्टनमा ३ पुरुष र २ महिला, टेबल टेनिसमा महिला पुरुष २/२ जना, उसुमा महिला पुरुष २/२ जना छनौट गरिने जानकारी दिइएको छ । कबड्डी स्वीकृत भए महिला पुरुष १०/१० जना खेलाडी थप हुने खेलकुद विकास समितिका अध्यक्ष राईले बताए ।

 

पत्रकार सम्मेलनमा सितोरियो कराते संघ खोटाङका प्रमुख प्रशिक्षक तथा अन्तर्राष्ट्रिय रेफ्री विचारी तामाङ, सितोरियो कराते संघ खोटाङका अध्यक्ष सञ्जयकुमार राई र जिल्ला खेलकुद विकास समितिका कार्यालय प्रमुख लिलाभक्त केसीको उपस्थिति रहेको थियो ।

प्रकाशित मिति : असोज ७ आइतवार, २०७५                                        समय  ७ : ४२ बजे, बेलुका