• सोमवार, कार्तिक १९, २०७५
• खोटाङ टुडे

खोटाङ । खोटाङको साकेला गाउँपालिकाले ५०४ जना ज्येष्ठ नागरिकलाई परिचयपत्र वितरण गरेको छ । बिभिन्न वडामा घुम्ती शिविरको आयोजना गरेर गाउँपालिकाले ५ वडामध्ये ४ वडाका ज्येष्ठ नागरिकलाई परिचयपत्र वितरण गरेको हो । राज्यबाट प्रदान गरिएका सेवासुविधा लिनका लागि अनिवार्य परिचयपत्र आवश्यक पर्ने भएकाले उनीहरुको सहजताका लागि गाउँपालिकाले ६० वर्षमाथिका नागरिकलाई वडामै पुगेर परिचयपत्र बाँडेको हो ।

साकेला गाउँपालिका–२ रतन्छाका १७८ जना, साकेला गाउँपालिका–३ खिदिमाका ११४ जना, साकेला गाउँपालिका–४ मानेभञ्ज्याङका ११६ जना र साकेला गाउँपालिका–५ मात्तिम मानेभञ्ज्याङका ९६ जना ज्येष्ठ नागरिकलाई परिचयपत्र वितरण गरिएको गाउँपालिकाका सामाजिक तथा आर्थिक विकास अधिकृत दुर्गाबहादुर राईले बताए । गाउँपालिकाको केन्द्रसम्म आइनपुगेका बृद्धबृद्धालाई सहजताकासाथ परिचयपत्र दिलाउने उद्धेश्यकासाथ गाउँपालिकाले बुधबारदेखि शनिबारसम्म परिचयपत्र वितरण कार्यक्रम सञ्चालन गरेको हो ।

शिबिरका माध्यमबाट यस अवधिमा ६७ जना फरक क्षमता भएका नागरिकलाई पनि परिचयपत्र वितरण गरिएको गाउँपालिकाले जनाएको छ । साकेला गाउँपालिका–२ रतन्छाका ११ जना, साकेला गाउँपालिका–३ खिदिमाका २१ जना, साकेला गाउँपालिका–४ मात्तिमका २३ जना र साकेला गाउँपालिका–५ मात्तिम मानेभञ्ज्याङका १२ जनालाई फरक क्षमताको परिचयपत्र वितरण गरिएको गाउँपालिकाले जनाएको छ ।

साकेला गाउँपालिका–१ बाँझेच्यानडाँडाका ज्येष्ठ नागरिक र फरक क्षमता भएका नागरिकलाई भने समय अभावका कारण तिहारपछि परिचयपत्र वितरण गरिने गाउँपालिका प्रमुख अर्जुन खड्काले बताए ।