• सोमवार, पुस ११, २०७९
• खोटाङ टुडे

ललित राई खोटाङ: ११ पुस, प्रधानमन्त्री कृषि आधुनिकीकरण परियोजनाअन्तर्गत खोटेहाङ गाउँपालिका- ८ सिम्पानीमा सुन्तला खेतिसम्बन्धी दुई दिने तालिम शुरू भएको छ।

खुप्तुङ कृषि फर्म खोटेहाङ ६ को आयोजना तथा कृषि ज्ञानकेन्द्र खोटाङको आर्थिक तथा प्राबिधिक सहयोगमा रोग किरा ब्यवस्थापन र काँटछाँट एबम मलपानी दिने सम्बन्धी तालिम सोमवार शुरू भएको हो।

खोटेहाङ गाउँपालिका ५ चिप्रिङ, ६ इन्द्रेणीपोखरी र ८ सिम्पानीका सुन्तला खेती गरिरहेका ४२ जना कृषकहरू सहभागी रहेको तालिमको प्रशिक्षकमा बाली संरक्षण अधिकृत रामनन्दन यादब रहनुभएको छ। तालिमको पहिलो दिन सोमबार सुन्तलामा देखिने रोग र किराको ब्यवस्थापनसम्बन्धी प्रशिक्षण दिइएको थियो। मंगलबार सुन्तलाको बोटबिरुवा काँटछाँट तथा मलपानी दिने बिधिसम्बन्धी प्रशिक्षण रहने आयोजक खुप्तुङ कृषि फर्म खोटेहाङ -६ इन्द्रेणीपोखरीका सन्चालक इन्द्र नारथुङेले बताउनुभयो।

प्रधानमन्त्री कृषि आधुनिकीकरण परियोजनाअन्तर्गत खोटेहाङ गाउँपालिकामा सुन्तला जात तथा फलफुलको ब्लक बिकाससम्बन्धी कार्यक्रम सन्चालन भइरहेको छ।