• सोमवार, मंसिर १०, २०७५
• खोटाङ टुडे

मंसिर १० सोमवार, २०७५

खोटाङ । खोटाङको दिक्तेल रुपाकोट मझुवागढी नगरपालिकाले दिक्तेलबजारबासीलाई फोहोरमैला संकलन कार्ड वितरण सुरु गरेको छ । ‘सफा र सुन्दर नगरपालिका’ निर्माणका लागि अभियान थालेको नगरपालिकाले दिक्तेलबजारभित्र बसोबास गर्ने घरमुली तथा व्यवसायीलाई फोहोर संकलन कार्ड वितरण सुरु गरेको हो ।

दिक्तेल बजारको रत्नपार्कदेखि हाटडाँडा क्षेत्रमा क्रियासिल ६ वटा टोल विकास संस्थासँगको सहकार्यमा नगरपालिकाले आईतवारदेखि फोहोर संकलन कार्ड वितरण थालेको जनाएको छ । ५ सय रुपैयाँ शुल्क तोकिएको कार्ड दिक्तेलबजारका सम्पूर्ण घरमुली र व्यवसायीलाई अनिवार्य गरिएको छ ।

दिक्तेलबजार आसपासका पुरानो फोहोर ल्याण्डफिलसाईटमा लगेर फालिएपछि दैनिकजसो निस्कने फोहोरमैला कन्ट्रयाक्टर कालिका फोहोरमैला व्यवस्थापन तथा प्रशोधन प्रालिमार्फथ व्यवस्थापनका कामका थालिए पनि सो कामले निरन्तरता पाउन नसकेको स्थानीयको गुनासो छ । बजार क्षेत्रमा जथाभावी मिल्काइएका फोहोरमैला हटाउन अभियान थालिए पनि जथाभावी फोहोरमैला मिल्काउने समस्या यथावत देखिएको छ ।

खोटाङबजारबाट २०२२ सालमा सदरमुकाम सारिएको दिक्तेलस्थित जयपुरेडाँडामा २०६३ साल यता नियमित फोहोरमैला थुपार्ने गरिएको छ । सरसफाई अभियान चलाइएपनि स्थानीयले मादक पदार्थका बोतल, शिशा, प्लाष्टिक, धातुका टुक्रा लगायतका फोहोरमैला थुपार्दा जयपुरीडाँडामा पुःन फोहोरमैलाको थाक लागेको छ ।

स्थानीय तहको निर्वाचन अघि जिल्ला समन्वय समिति, प्रशासन, तत्कालिन नगरपालिकाको कार्यालय लगायतको सहकार्यमा जयपुरीडाँडाको फोहोर हटाइए पनि स्थानीयले पुःन फोहोर थुपार्दै आएका छन् ।