• शुक्रबार, माघ ५, २०८०
• खोटाङ टुडे

 

खोटाङ । खोटाङ र उदयपुर जोड्ने धाप्लाङघाटस्थित सुनकोसी नदीमाथिको निर्माणाधीन मोटरेबल पुलको प्रदेशसभा सदस्य भुपेन्द्र राईले अनुगमन गरेका छन् । विगत ७ वर्षदेखि अलपत्र अवस्थामा रहेको पुल निर्माणका लागि ठेकेदार कम्पनीलाई लगातार खबरदारी गरिरहेका प्रदेशसभा सदस्य राई बिहीवार खोटाङको बराहपोखरी गाउँपालिका–२ सुन्तले र उदयपुरको त्रियुगा नगरपालिका–१४ साउने जोड्ने सुनकोसी नदीमाथिको पुलकोे स्थलगत अनुगमनका लागि धाप्लाङघाट पुगेका हुन ।
लामो समयदेखि अलपत्र परेको पुलको काम प्रदेशसभा सदस्य राईको पहलमा डेढ महिना अघिदेखि पुलको निर्माणको कामले गति लिन थालेको छ । मोटरवेल पुलबारे अनुगमन गर्न धाप्लाङघाट पुगेका राईले सरोकारवालासँग पुलको कामको प्रगतिका बारेमा जानकारी लिएका थिए ।

रसुवा एसएनएस पप्पु जेभीले २०७६ सालभित्र सम्पन्न गर्नेगरी २०७३ सालमा धाप्लाङघाट पुल निर्माणको सम्झौता गरेको ठेकेदारले हालसम्म धाप्लाङघाटमा नदीको दुई किनारमा पिलर ठड्याएको छ ।

धाप्लाङघाटमा मोटरेबल पुल नहुँदा सबैभन्दा बढी कृषि तथा नगदे बाली निर्यातका क्रममा लोडअनलोड गर्दा किसानले थप व्यायभार खेपिरहेको बराहपोखरी गाउँपालिकाका अध्यक्ष शालिकराम बञ्जरा बताउँछन् । धाप्लाङघाटमा खोटाङ र उदयपुरतर्फ वर्षौँअघि कच्ची सडक बनिसकेको भएपनि हालसम्म पुल नहुँदा झोलुंगे पुल प्रयोग हुँदै आएको छ ।

खोटाङको बराहपोखरी गाउँपालिका, जन्तेढुंगा गाउँपालिका, खोटेहाङ गाउँपालिका र तथा भोजपुरका केही स्थानीयलाई पूर्वी शहरसँग जोड्ने पुल २०७४ भदौ ३१ गते तत्कालिन प्रधानमन्त्री एबं कांग्रेस सभापति शेरबहादुर देउवाले शिलान्यास गरेका थिए ।