• शनिबार, जेष्ठ १२, २०८१
• खोटाङ टुडे

 

खोटाङ / बाबुको हत्या गरी दाहसंस्कार गरेको आरोपमा साकेला गाउँपालिका-२ रतन्छा मबुका ४२ वर्षीय टिकाराम राई पक्राउ परेका छन् ।

सामान्य विवादमा कुटपिट गर्दा ७१ वर्षीय बाबु कृष्णकुमार राईको मृत्यु र दाहसंस्कार समेत गरिसकेको भन्ने उजुरीपछि राईलाई पक्राउ गरिएको हो ।

प्रहरी नायव उपरीक्षक पुरुषोत्तम खड्काका अनुसार राईलाई बिहीबार पक्राउ गरी शुक्रबार तीन दिनको म्याद थप गरी अनुसन्धान बढाएको छ ।

बाबुको मृत्यु बारे आफूलाई समेत राम्ररी खबर नगरेको र टिकारामको कुटपिटकै कारण बाबुको मृत्यु भएको भन्दै भाइ नवीनकुमार राईले किटानी जाहेरी दिएको प्रहरीले जनाएको छ ।

गत जेठ ७ गते विहान करिब दश बजेतिर बाबुको सुतिरहेकै अवस्थामा मृत फेला परेको भन्दै टिकारामले गाउँलेलाई खबर गरी दाहसंस्कार गरेको तर दाहसंस्कारको तीन दिनपछि बिहीबार विहान ६ बजे प्रहरी सञ्चारमा शंकास्पद मृत्युको जानकारी गराएपछि डिएसपी खड्काको नेतृत्वमा गएको प्रहरीले अनुसन्धान गर्नुका साथै शव उत्खनन् गरी पोष्टमार्टमका लागि दिक्तेल अस्पतालमा ल्याएको हो ।