• सोमवार, अशोज १३, २०८२
• खोटाङ टुडे

खोटाङ /खोटाङमा  युवाको एक समूहले ‘दसैँतिहार, चेलीलाई उपहार अभियान–२०८२’ सञ्चालन गर्ने भएको छ । कमजोर आर्थिक अवस्था भएका वा यातायात सेवा नपाएर समस्यामा परेका चेलीलाई दसैँतिहार मनाउन माइतीघर पु¥याउने तथा माइतीघरबाट पुनः कर्मघर फर्काउन युवा समूहले निःशुल्क यातायात सेवा उपलब्ध गराउनेगरी अभियान सञ्चालन गर्ने भएको हो ।

दसैँको अवसरमा यही असोज–१६ गतेदेखि १९ गतेसम्म तथा तिहारको अवसरमा आगामी कातिक–५ गतेदेखि ७ गते अभियान सञ्चालन गरिने दसैँतिहार, चेलीलाई उपहार अभियानका संयोजक सञ्जयकुमार राईले जानकारी दिनु भयो । गत बर्ष ४१५ जना चेलीले निःशुल्क सेवा लिएका थिए ।  यस वर्ष सञ्चालन गर्ने अभियानका लागि अहिलेसम्म चार पाङ्ग्रे एउटा गाडी र विभिन्न क्षेत्रमा कार्यरत २५ जना युवाले स्वतःस्फूर्त सहभागी हुनेगरी नाम दर्ता गराइसकिएको जनाइएको छ ।

अभियानका लागि जिल्लास्थित दशवटै स्थानीय तहमा संयोजक तोकिएको  छ । दुई चरणमा सञ्चालन हुने अभियानको सहसंयोजकमा मौषम कार्की, आर्थिक व्यवस्थापन सकितिको संयोजकमा महिला उद्यमी विमला राई, सचिवालय व्यवस्थापकमा अनिशा रम्तेल, अञ्जना आचार्य, रस्मिता आचार्य र खियामा राईलाई तोकिएको छ ।

मध्यपहाडी लोकमार्ग तथा सगरमाथा राष्ट्रिय राजमार्गका विभिन्न सडकखण्ड तथा जिल्लाका सबै ग्रामीण सडकहरुको ३५ किलोमिटरसम्म सेवा उपलब्ध गराइने, सरकारी सेवा लिइरहेकालाई सेवा दिन नसकिने,अभियानका क्रममा महिला, बालबालिका, वृद्धावस्थाका तथा अपाङ्गता भएका व्यक्तिलाई विशेष प्राथमिकता दिइने पत्रकार सम्मेलन मार्फत जानकारी गराइएको हो ।