• बुधबार, पुस ९, २०८२
• खोटाङ टुडे

खोटाङ/ खोटाङमा बास बस्न आएका व्यक्तीबाटै वृद्धवृद्धा दम्पत्ती लुटिएका छन् । उदयपुर घर र थर राई बताउने दुई युवाबाट साकेला गाउँपालिका–१ बाँझेच्यानडाँडा झगरपुरका ज्ञानबहादुर बुढाथोकी र चन्द्रकुमारी बुढाथोकी लुटिएका हुन् ।

पुस ६ गते राती बुढाथोकी दम्पत्तीको हातखुट्टा बाँधेर पेस्तोल र खुकुरी देखाएर गरगहना र पैसा लुटपाट गरेको पीडित परिवारले बताएका छन् । बास बस्ने वाहनामा बुढाथोकी दम्पत्तीको सुनको एक तोलाको कुण्डल, गनेर राखिएको नगद १ लाख ५० हजार, नगनी राखिएको करिब ६०० रुपैयाँ र तीन थान मोबाईल लुटिएको ज्वाई लिलाबहादुर खत्रीले बताए । लुटिएकामध्ये दुई थान मोबाईल भने पुस ७ गते बारीमा भेटिएको छ ।

चिनजानका क्रममा अपरिचित व्यक्तीहरुले आफुहरु काठ ओसारपसारको काम गर्नेगरेको बताएका थिए । पुस २ गते तीन जनाको समुह बुढाथोकीको घरमा बास बस्न पुगेका थिए । पुःन पुस ६ गते राती बास माग्दै पुगेका समुहले भने लुटपाट मच्याएको हो । पुस २ गते बास बस्न आएकामध्ये एक जना भने पुस ६ गते पनि आएको बुढाथोकी परिवारको भनाई छ । पीडित परिवारले घटनाको आवश्यक अनुसन्धान गरी कारबाहीका लागि पुस ७ गते जिल्ला प्रहरी कार्यालय खोटाङमा जाहेरी दिएका छन् ।