• सोमवार, पुस ३०, २०७५
• खोटाङ टुडे

पुस ३० सोमवार, २०७५
इलाम । चिकित्सा शिक्षाको सुधारको माग गर्दै अनसनमा बसेका डाक्टर गोविन्द केसीको स्वास्थ्यमा समस्या भएपछि सोमवार बिहान जिल्ला अस्पताल इलाममा भर्ना गरिएको छ । डाक्टर केसीको स्वास्थ्य स्थिति गम्भीर बन्दै गएपछि उनलाई जिल्ला अस्पतालमा भर्ना गरिएको हो ।

डा.केसीको रक्तचाप बढ्नुका साथै फोक्सोमा सङ्क्रमण बढ्दै गएको र मुटुको गति पनि अनियमित भएर शिथिल भएपछि अस्पताल भर्ना गरिएको डा.केसीका वार्ता टोली सदस्य अधिवक्ता डा सुरेन्द्र भण्डारीले बताए । अस्पताल भर्ना गरिएपनि डा. केसीले औषधि भने लिन मानेका छैनन् ।

वार्ता टोली सदस्य भण्डारीका अनुसार केसीको अवस्था नाजुक बन्दा पनि सरकारले वास्ता नगरेको बताए । डा. केसी चिकित्सा शिक्षा विधेयक जनताका पक्षमा हुनुपर्ने, १५औँ अनसनका क्रममा सरकारले गरेको सहमति कार्यान्वयन हुनु पर्नेसहितका छ बुँदे माग राखेर इलाममा पुस २५ गतेदखि अनसन बसेका हुन । डा.केसीको १६ औँ पटकको अनसनको आज छैटौँ दिन हो ।