• बुधबार, माघ २, २०७५
• खोटाङ टुडे

माघ २ बुधवार, २०७५
खोटाङ । खोटाङको जन्तेढुंगा गाउँपालिकाका सरकारी कार्यालयमा ई–हाजिरी उपकरण जडान सुरु गरिएको छ । कर्मचारीको उपस्थितिलाई नियमित र व्यवस्थित गर्नका लागि गाउँपालिकाको कार्यालय, प्राथमिक स्वास्थ्य केन्द्र, सबै वडा कार्यालय, स्वास्थ्यचौकी र २० विद्यालयमा ई–हाजिरी व्यवस्थाका लागि उपकरण जडानका काम सुरु गरिएको हो ।

प्रविधिको प्रयोग मार्फत कर्मचारीलाई सेवाप्रति थप जिम्मेवारी बनाउने लक्ष्यकासाथ ई–हाजिरीको व्यवस्था गर्न लागिएको जन्तेढुंगा गाउँपालिकाका सामाजिक विकास समिति संयोजक विदुर राईले बताए ।

हालसम्म प्राथमिक स्वास्थ्य केन्द्र र दिप्लुङ वडा कार्यालयमा ई–हाजिरी उपकरण जडान सम्पन्न भइसकेको छ । अन्य सरकारी कार्यालयमा पनि ई–हाजिरीका उपकरण जडानको काम भइरहेको गाउँपालिकाले जनाएको छ । गाउँपालिकाका ३६ विद्यालयमध्ये सोलार भएका २० विद्यालयमा मात्र ई–हाजिरीको व्यवस्था गर्न लागिएको सामाजिक विकास समिति संयोजक राईले बताए । आगामी माघ दोश्रो साताभित्र उपकरण जडान गरिसकेर ई–हाजिरी कार्यान्वयनमा ल्याउने गरी काम थालिएको हो ।