• शुक्रबार, माघ ११, २०७५
• खोटाङ टुडे

माघ ११ शुक्रवार, २०७५
खोटाङ । खोटाङको दिप्रुङ चुइचुम्मा गाउँपालिका दुई जना समाजसेवीले जिल्ला प्रहरी कार्यालयलाई साढे ४ रोपनी जग्गा निशुल्क प्रदान गरेका छन् । दिप्रुङ चुइचुम्मा”५ का मानबहादुर खत्रीले ३ रोपनी र ज्ञानबहादुर राईले डेढ रोपनी जग्गा शुक्रवार जिल्ला मालपोत कार्यालयमा आएर प्रहरीका नाममा रजिष्ट्रेसन पास गरी दिएका हुन् ।

पालिकाको कार्यालय रहेको स्थानमा प्रहरी कार्यालय राख्ने सरकारको नीति अनुरुप गाउँपालिकाको पहलमा प्रहरीलाई जग्गा उपलव्ध गराएको गाउँपालिका अध्यक्ष भूपेन्द्र राईले जानकारी दिए । जग्गा पास भएपछि जग्गाको धनीपूर्जा जिल्ला प्रहरी कार्यालय खोटाङका प्रमुख प्रहरी नायव उपरिक्षक राजकुमार केसीलाई शुक्रवार नै गाउँपालिका अध्यक्ष राईले हस्तान्तरण गरेका छन् ।

पालिकाको केन्द्र रहेको स्थानमा बैंक तथा वित्तिय संस्था समेत रहने भएकाले सुरक्षाको दृष्टिकोणले प्रहरी कार्यालय आवश्यक रहेकोले प्रहरी कार्यालयको भवन निर्माणको लागि माथिल्लो निकायमा तत्काल पहल गर्ने प्रनाउ केसीले बताए । यसअघि गाउँपालिकाको नाममा १५ रोपनी जग्गा निशुल्क प्राप्त गरी भवन निर्माण भई सकेको गाउँपालिकाले जनाएको छ ।