• मङ्लबार, माघ १५, २०७५
• खोटाङ टुडे

माघ १५ मंगलवार, २०७५
खोटाङ । खोटाङको जालपामा हुने आठौं लाटोकोसेरो तथा हुचिल उत्सवको तयारी पूरा भएको छ । अन्तर्राष्ट्रिय लाटोकोसेरो महोत्सवको अवशर पारेर दिक्तेल रुपाकोट मझुवागढी नगरपालिका–१२ जालपा वडा कार्यालय र प्रकृतिका साथीहरु नामक संस्थाको सहकार्यमा माघ १८ र १९ गते हुने नेपाल लाटोकोसेरो तथा हुचिल उत्सवको तयारी पूरा भएको हो ।

महोत्सव सम्पन्न गर्नका लागि जालपामा लाटोकोसेरो तथा हुचिल स्तम्भ निर्माण, उत्सवस्थल पुग्ने सिँढी, मञ्च निर्माण, विद्युत व्यवस्थापन लगायतका काम पूरा भएको लाटोकोसेरो तथा हुचिल उत्सव आयोजक मूल समितिका संयोजक एबं वडाध्यक्ष विकास राईले वताए ।

यस्तै, उत्सवका लागि लोपोन्मुख बनेका साँस्कृतिक नृत्य, गीत, वाद्यवादन, लोपोन्मुख खेल प्रदर्शनको तयारी पूरा भइसकेको छ । यसबाहेक लाटोकोसेरो तथा हुचिल उत्सवस्थल जालपा पुग्नका लागि मध्यपहाडी लोकमार्गको हुलुङबाट जालपा पुग्ने सडक निर्माण, अस्थायी संग्रहालय निर्माणको काम पनि अन्तिम चरणमा परेको वडाध्यक्ष राईले बताए । ‘किसानको साथी’कारुपमा रहेको र प्राकृतिक सन्तुलन कायम गर्नमा भूमीका निर्वाह गरिरहेको लाटोकोसेरो तथा हुचिल संरक्षणमा टेवा पु¥याउनका लागि जालपामा उत्सवको आयोजना गरिएको हो । लाटोकोसेरो तथा हुचिल उत्सव नेपाल, अमेरिका र इटालीमा मात्र हुँदै आएको छ ।

जिल्ला तथा जिल्ला बाहिरका गरी करिव ५ हजारको सहभागीता रहने भनिएको उत्सवको पहिलो दिन लाटोकोसेरो सम्वन्धी लघु म्यूजियम प्रदर्शनी, चरा अवलोकन, प्रकृतिको तस्विर खिच्ने, घिर गाडे, झुलो चकमक र लाथ्रो लगायतका स्थानीय लोपोन्मुख खेल प्रदर्शनी एबं प्रतियोगीता सञ्चालन गरिने छ । सोही दिन राती लाटोकोसेरोको महत्व दर्शाउने खालका स्लाईड तथा भिडियो प्रदर्शनी गरिने आयोजकले जनाएको छ । अवैध चोरीनिकासी, वन बिनास, विषादिको प्रयोग लगायतका कारण लोपोन्मुख अवस्थामा पुगेको लाटोकोसेरो तथा हुचिल संरक्षणका लागि सचेतना जगाउन उत्सवको आयोजना गरिएको प्रकृतिका साथीहरुका कार्यकारी निर्देशक राजु आचार्यले बताए ।

‘लाटोकोसेरो तथा हुचिल संरक्षणमा हातेमालो गरौं’ भन्ने नारासहित सञ्चालन हुने लाटोकोसेरो तथा हुचिल उत्सवको दोश्रो दिन वन विज्ञान अध्ययन संस्थान पोखराका विद्यार्थीवाट लाटोकोसेरो संरक्षण सम्बन्धी नाच, स्थानीय तामाङको डम्फु र सेलो, शेर्पाको सेब्रु, राईको साकेला र मारुनी, हिन्दु महिलाको संगीनी नाच, गूरुङको सालैज्यू, बालन, सडक नाटक, हाक्पारे गीत, मुर्चुङ्गा, पीपीरी, यलम्बर, मादल, बाँसुरी लगायतका स्थानीय बाजा प्रदर्शनी लगायतका कार्यक्रम राखिएको छ ।

उत्सवमा लाटोकोसेरोको एक फिट अग्लो रोबोट, लाटोकोसेरो सम्बन्धी जानकारी भएको सूचना, चित्र तथा फोटो, त्रिभुवन विश्वविद्यालय अन्तरगत प्राकृतिक विज्ञान संग्रहालयबाट लाटोकोसेरोको नमूना, गहुँको छवाली, चुरा तथा माटोबाट वनाइएका लाटोकोसेरा समेत प्रदर्शनीमा राखिने आयोजकले जनाएको छ । उत्सवमा आठ किसिमका लाटोकोसेरोको आवाज सुन्ने व्यवस्था मिलाइने छ । नेपालमा पाइने २३ प्रजातीका लाटोकोसेरोमध्ये ८ प्रजातीका दुर्लभ किसिमका छन् ।

उत्सवको अन्तिम दिन तीन संरक्षणकर्मीलाई प्राकृतिक संरक्षण पुरस्कार तथा बन्यजन्तु अनुसन्धान र संरक्षणको काममा योगदान दिएका मिथिला वाईल्डलाईफ ट्रष्ट धनुषा र हिमालयन नेचर काठ्माण्डौंलाई सम्मान गर्ने कार्यक्रम छ । दुई स्थानीय संरक्षणकर्मीलाई समेत सम्मान गर्ने आयोजकले जनाएको छ । उत्सवका लागि बिभिन्न ११ उपसमिति गठन गरिएको छ ।