• सोमवार, बैशाख २३, २०७६
• खोटाङ टुडे

बैशाख २३ सोमवार, २०७६
खोटाङ । नवौं राष्ट्रिय महाधिबेसनमा जुटेको किरात राई विद्यार्थी संघ केन्द्रीय समितिलाई नेपाल विद्यार्थी संघ खोटाङले सहयोग रकम संकलन गरेर हस्तान्तरण गरेको छ ।

आगामी बैशाख २६ गतेदेखि तीन दिनसम्म दिक्तेलमा हुने किरात राई विद्यार्थी संघको राष्ट्रिय सम्मेलन सफल बनाउनका लागि नेविसंघले सहयोग रकम संकलन गरेर हस्तान्तरण गरेको हो ।

फरक विद्यार्थी संघ भएपनि मित्रशक्तीप्रतिको सद्भाव र सौहाद्रताका लागि ४८ हजार १ सय ७७ रुपैयाँ रकम संकलन गरेर किरात राई विद्यार्थी संघलाई प्रदान गरिएको नेविसंघ खोटाङका सभापति राजकुमार बस्नेतले बताए ।

विभिन्न ५२ दाताबाट संकलन गरिएको रकम आईतबार साँझ सगरमाथा होटलमा आयोजित कार्यक्रममा कांग्रेस जिल्ला सभापति नरेशकुमार श्रेष्ठले किरात राई विद्यार्थी संघ केन्द्रीय समिति अध्यक्ष बिर्सिका राईलाई हस्तान्तरण गरेका छन् ।

फरक संगठन भएपनि शैक्षिक अधिकार र मुद्धामा सहकार्य गर्नुपर्ने भएकाले नेविसंघमार्फत सहयोग रकम संकलन गरिएको तरुण दल खोटाङका उपसभापति सञ्जयकुमार राईले बताए ।

महाधिबेसनका लागि नेविसंघले किरावि संघलाई सहयोग गरेपछि यायोक्खाले समेत प्रशंसा गरिरहेका छन् । नेबिसंघले महाधिबेसनकाक्रममा स्वयंसेवककारुपमा समेत सहयोग गर्ने आश्वसन दिएको छ ।

‘पहिचान र संघीय शिक्षा प्रणाली लागू गरौँ, किराँत स्वयत्त राज्य निर्माण गर्नका लागि गाउँ नगर लागौँ’ भन्ने नारासहित दिक्तेलमा किरात राई विद्यार्थी संघ केन्द्रीय समितिको राष्ट्रिय महाधिबेसनको तयारी भइरहेको छ ।

विभिन्न १९ जिल्लाका किरात राई विद्यार्थी संघको प्रतिनिधि एबं पर्यवेक्षक गरी करिब ५ सयको सहभागीता रहने भएकाले सम्मेलनलाई सभ्य र भव्य बनाउनका लागि संघकी केन्द्रीय अध्यक्ष राई लगायतको टोली सम्मेलनको तयारीमा खटिएका छन् ।

किरात राई बिद्यार्थी संघको राष्ट्रिय सम्मेलनका कारण हुने जमघटले जिल्लाको आर्थिक र सामाजिक क्षेत्रमा समेत फाईदा पुग्ने भएकाले सम्मेलनलाई भव्य बनाउन लागि परेको किरात राई विद्यार्थी संघले जनाएको छ ।