• शुक्रबार, जेष्ठ २४, २०७६
• खोटाङ टुडे

जेठ २४ शुक्रवार, २०७६
खोटाङ । खोटाङकी गायिका अर्जुना राई पुःन नयाँ म्यूजिक भिडियो लिएर दर्शक/श्रोतामाझ आएकी छन् । सांगीतिक क्षेत्रमा भविष्य खोज्दै संघर्षरत अर्जुनाको ‘सजिएर डोली चढ्ने थियो रहर’ बोलको गीतको म्यूजिक भिडियो बजारमा आएको हो ।

गत माघमा मात्र ‘सम्झनामा आईरन्छौ’ वोलको पूर्वेली लोक भाकाको भिडियो बजारमा ल्याएकी अर्जुनाले चार महिनापछि पुःन अर्को म्यूजिक भिडियो सार्वजनिक गरेकी हुन् ।

आनन्द चाम्लिङको शब्द र डक्टर किरातको संगीत रहेको वियोगान्त गीतमा समीर पेस्ला, सविना ससपेन लगायतको अभिनय देख्न सकिन्छ । निसान एसकेको निर्देशन र बिक्रम कार्कीको एरेञ्जमा तयार पारिएको म्यूजिक भिडियो यूटुवमार्फत सार्वजनिक गरिएको हो ।

२०७३ सालमा ‘तिम्रो मायाँले मलाई के गरायो’ बोलको गीतमार्फत औपचारिक रुपमा सांगीतिक क्षेत्रमा प्रवेश गरेकी अर्जुनाले २०७४ सालमा ‘तिम्रो मायाँले मलाई के गरायो’ वोलको पहिलो गीति भिडियो बजारमा ल्याएकी थिईन् ।

सांगीतिक भविष्य खोजीकाक्रममा हङकङ बसाई छाडेर पुःन स्वदेश फर्किएकी अर्जुनाको यो पाँचौँ गीत हो । संगीतप्रतिको मोहका कारण दिप्रुङ चुईचुम्मा गाउँपालिका–१ याम्खाकी अर्जुनाले सानै उमेरदेखि जानकारी भएसम्म स्कुल/कलेजका कुनै पनि सांगीतिक कार्यक्रम छुटाइनन् ।

संगीतप्रतिको त्यही लगावका कारण उनको सांगीतिक यात्रा अघि बढ्दो छ । खोजी प्रतिभा र खोटाङ तारामा विभिन्न चरणको अनुभव संगालेकी अर्जुनाले विभिन्न स्टेज प्रोग्राममा पनि दर्शकलाई मनोरञ्जन दिलाउँदै आएकी छन् ।