• आइतवार, भदौ १, २०७६
• खोटाङ टुडे

भदौ १ आइतवार, २०७६
खोटाङ । जिल्ला समन्वय समिति खोटाङले कैंदीबन्दीलाई पुस्तक तथा खेलकुदका सामग्री प्रदान गरेको छ ।

जिल्ला कारागार शाखा दिक्तेलको भौतिक संरचना, कारागार व्यवस्थापन, कैंदीबन्दीको अवस्था लगायतको विषयमा निरिक्षण गरेको दोश्रो दिन जिल्ला समन्वय समितिले कैंदीबन्दीलाई पुस्तक तथा खेलकुद सामग्री प्रदान गरेको हो ।

जिल्ला समन्वय समितिका प्रमुख बबी चाम्लिङको नेतृत्वमा आईतबार गएको टोलीले कैंदीबन्दीलाई राजनीति, दर्शन, विज्ञान, समाज, शिक्षा लगायत सम्वन्धी करिब सय थान पुस्तक प्रदान गरेको हो ।

यस्तै, कैंदीबन्दीलाई भलिबल, व्याडमिन्टन र लुँडोको खेल सामग्री प्रदान गरिएको छ । पुस्तक तथा खेल सामग्री जिसस प्रमुख चाम्लिङ, प्रमुख जिल्ला अधिकारी विष्णुहरि उपाध्याय, जिल्ला समन्वय अधिकारी राजेश गिरी लगायतले चौकीदार प्रताप राईलाई हस्तान्तरण गरेका छन् ।

कारागारभित्रै स्थापना गरिएको पुस्तकालयमा राख्न तथा कैंदीबन्दीको अध्ययनका लागि पुस्तक प्रदान गरिएको जिल्ला समन्वय समितिका प्रमुख चाम्लिङले बताए ।

पुस्तक तथा खेलकुद सामग्री हस्तान्तरण कार्यक्रममा जिसस प्रमुख चाम्लिङले शनिबार गरिएको कारागार अनुगमनको प्रतिबेदन कारागार शाखाका प्रमुख चित्राखर आचार्यलाई हस्तान्तरण गरेका छन् ।